Algengar spurningar

Ef þú finnur ekki svarið hér getur þú haft samband í netspjallinu eða sent okkur skilaboð.

Hvað er hægt að fá að láni í Borgarbókasafninu?

Borgarbókasafnið á fjölbreytt úrval bóka, tímarita, tónlistar, kvikmynda, tungumálanámskeiða og annars fyrir alla aldurshópa.

Þú getur leitað að öllu saman hér á þessum vef. Prófaðu að slá inn titil, höfund eða efni í leitargluggann hér fyrir ofan.

Auk þess er hægt að leigja eða kaupa myndlist eftir íslenska listamenn í Artóteki Borgarbókasafnsins, sem er í Grófinni, Tryggvagötu 15. Sjá nánar á artotek.is.

Hvað kostar að taka bækur eða DVD að láni?

Það kostar ekkert aukalega að taka bækur, DVD eða hvað sem er að láni – en þú þarft að eiga gilt bókasafnskort.

Er bókasafnskortið mitt í gildi?

Það er einfalt mál að athuga það: prófaðu að smella á „Mínar síður“ efst hér á síðunni og skrá þig inn. Ef bókasafnskortið þitt er útrunnið verður þér boðið að endurnýja gildistímann.

Ef kortið er í gildi getur þú séð gildistímann með því að opna „Mínar síður“ og velja „Mínar stillingar“.

Hvað kostar bókasafnskort?

Sjá allt um árgjald fyrir bókasafnskort og önnur gjöld í gjaldskrá.

Hægt er að skrá nýtt eða endurnýja útrunnið kort hér á vefnum með því að skrá notanda inn á „Mínar síður“ hér fyrir ofan og greiða árgjald.

Börn og unglingar undir 18 ára aldri, eldri en 67 ára og öryrkjar þurfa ekki að greiða fyrir skírteini.

Sem stendur er ekki hægt að skrá eða endurnýja ókeypis skírteini hér á vefnum, þau eru skráð í afgreiðslu bókasafnsins.

Bókasafnsskírteini eru innifalin í Menningarkortum, en þau gilda einnig á Listasafn Reykjavíkur og Minjasafn Reykjavíkur. Sjá nánar um Menningarkortin á menningarkort.is.

Má ég nota bókasafnskort einhvers annars eða má ég lána mitt kort?

Nei. Bókasafnskort Borgarbókasafns eru gefin út á einstakling og það er óheimilt að nota kort annarra. Sem eigandi bókasafnskorts berð þú ábyrgð á öllu efni sem lánað er út á það.

Hvað með fólk sem kemst ekki á bókasafnið vegna aldurs eða fötlunar?

Borgarbókasafnið býður upp á heimsendingarþjónustu sem nefnist Bókin heim.

Hvað gildir bókasafnskortið lengi og hvar get ég notað það?

Bókasafnskortið gildir í eitt ár. Kortið gildir í öllum söfnum Borgarbókasafns sem og í Bókasafni Seltjarnarness og Bókasafni Mosfellsbæjar.

Hvað má ég hafa bækurnar lengi?

Útlánstími gagna er mismunandi en bækur eru að jafnaði lánaðar út í 30 daga, tónlist í 2 vikur og myndefni í viku.

Fullorðnir geta haft allt að 40 gögn að láni á sama tíma; börn undir 18 ára aldri geta haft að hámarki 15 gögn að láni á sama tíma.

Get ég séð á netinu hvað ég er með í láni?

Já. Þú getur skráð þig inn hér efst á síðunni, þar sem stendur „Mínar síður“. Til þess notar þú annaðhvort kennitölu og PIN númer (það sama og í sjálfsafgreiðsluvélunum) eða rafræn skilríki.

Þar geturðu séð hvað þú ert með í láni og hvenær þarf að skila, þú getur fylgst með frátektum, endurnýjað útlán, greitt sektir og endurnýjað bókasafnskortið ef þarf.

Hversu háar eru sektir?

Sjá allt um sektir og gjöld í gjaldskrá.

Kemst ég á netið í Borgarbókasafninu?

Aðgangur er að tölvum og internetinu í öllum söfnum Borgarbókasafnsins gegn vægu gjaldi sem finna má í gjaldskrá.

Einnig er þráðlaust net í öllum söfnum Borgarbókasafnsins og geta gestir því komist á netið í fartölvum sínum, símum o.s.frv.

Hvað gerist ef ég týni eða skemmi efni sem ég er með í láni?

Greiða þarf fyrir gögn sem glatast eða skemmast í meðförum lánþega. Viðmiðunargjald fyrir glötuð eða ónýt gögn má sjá í gjaldskrá.

Er hægt að framlengja lán?

Já. Þú getur skráð þig inn hér efst á síðunni, þar sem stendur „Mínar síður“. Til þess notar þú annaðhvort kennitölu og PIN númer (það sama og í sjálfsafgreiðsluvélunum) eða rafræn skilríki.

Þar geturðu framlengt hverju láni tvisvar sinnum. Þú getur líka fengið framlengt með því að hringja í bókasafnið eða mæta á staðinn: Sjá staðsetningar og símanúmer safnanna.

Get ég pantað bækur eða annað efni?

Já, til að taka frá bækur eða annað efni hér á vefnum þarftu bara að smella á titilinn, velja „Taka frá“ og velja svo hvert þú vilt sækja. Þú getur líka sent okkur skilaboð á Facebook, haft samband í vefspjallinu eða hringt á safnið: Sjá staðsetningar og símanúmer safnanna.

Get ég pantað efni frá öðrum bókasöfnum?

Já. Þegar þú tekur frá bækur eða annað efni hér á vefnum þarft þú bara að tilgreina hvert þú vilt sækja; ef efnið er til á einhverju safnanna okkar verður næsta lausa eintak sent á milli.

Sömuleiðis er hægt að fá sendar frátektir frá samstarfssöfnum okkar í Mosfellsbæ og Seltjarnarnesi en til þess þarf að hafa beint samband við afgreiðslur þeirra safna.

Loks er hægt að panta millisafnalán fyrir bækur eða annað efni frá bókasöfnum á landsbyggðinni eða utan landsins, sjá nánar í leiðbeiningum um millisafnalán.

Tekur Borgarbókasafnið við bókagjöfum?

Nei, því miður getum við ekki tekið við bókagjöfum.