Um þennan viðburð

Tími
20:00 - 22:00
Verð
Frítt
Hópur
Fullorðnir
Spjall og umræður

Bókakaffi I Kapítóla

Miðvikudagur 24. október

Hin hugumdjarfa Kapítóla á sérstakan sess í hjörtum margra íslenskra lesenda. Hún kom fyrst fyrir sjónir þeirra í formi framhaldssögu í Heimskringlu á árunum 1896 og 1897, en hefur síðar verið gefin út í bókarformi - og það nokkrum sinnum.

Kapítóla segir af fjörkálfinum snarráða, samnefndri Kapítólu, sem flyst af götum New York borgar til skapstirða majórsins Ira Warfield í Fellibyljahöll hans í Virginíu. Þar lendir hún í ekki síðri ævintýrum en tekst um leið að heilla alla upp úr skónum, jafnt karlfauskinn Warfield, sem reynir af veikum mætti að gera úr henni hefðardömu, sem ræningjaforingjann svarta Donald.

Höfundur Kapítólu, E.D.E.N. Southworth, skrifaði fleiri en sextíu sögur, en margar þeirra fjalla um sjálfstæðar og uppreisnargjarnar stúlkur, andstætt hugmyndum Viktoríutímabilsins um hvernig ungar stúlkur ættu helst að haga sér. Raunverulegt nafn höfundar var Emma Dorothy Eliza Nevitte Southworth, en hún var einhver víðlesnasti og hæst launaði rithöfundur Bandaríkjanna á seinni hluta 19. aldar.

Silja Aðalsteinsdóttir þýðandi, sem hafði umsjón með nýútkominni endurútgáfu á verkinu fjallar um hina dáðu Kapítólu á Bókakaffi í Gerðubergi miðvikudagskvöldið 24. október. Allir velkomnir meðan húsrúm leyfir.

Bókakaffi í Gerðubergi er hluti kaffikvölda í Gerðubergi og haldið mánaðarlega yfir vetrarmánuðina, fjórða miðvikudagskvöld í mánuði. Það er vinsæll liður í viðburðadagskrá Borgarbókasafnsins. Þetta misserið verður litið um öxl: Við eltum Tinna til Sovétríkjanna og víðar; eigum endurfundi við hina dáðu Kapítólu; og hverfum loks aftur til 1918 í fylgd Sjón og Mána Steins.

Umsjón:

Sunna Dís Másdóttir, verkefnastjóri, sunna.dis.masdottir@reykjavik.is, s. 411 6109 og 699 3936. 

Bækur og annað efni