Café Lingua – lifandi tungumál er tungumálavettvangur á vegum Borgarbókasafnsins í samstarfi við ýmsa aðila í samfélaginu og er gátt inn í mismunandi tungumála- og menningarheima. Verkefnið hófst í Borgarbókasafninu í Grófinni 2012 þar sem 14 tungumálafulltrúar sátu við hvert sitt borð og miðluðu sínu tungumál til áhugasamra. Vigdís Finnbogadóttir, fyrrverandi forseti, heiðraði samkomuna og sagði meðal annars eftirfarandi í opnunarræðunni sinni:

Hér á Café Lingua gerist það skemmtilega, - hingað getum við komið til að tala tungum, - eins og postularnir. Hingað, á Café Lingua, getum við komið og æft okkur í að spjalla á ýmsum tungumálum, - fólk af erlendum uppruna sem vill til að mynda spjalla á íslensku, - sem er nú erfitt mál að læra, - og svo einnig við heimamenn sem viljum stofna til samtals og umræðna á einhverju því tungumáli sem hér verður á boðstólum.

Á þeim sex árum sem verkefnið hefur verið starfandi hafa fjölmörg tungumál verið kynnt í gegnum tónlist, bókmenntir, frásagnir og skapandi miðlun. Viðburðaröðin Cafe Lingua – lifandi tungumál hefur teygt anga sína víða og sett svip sinn á samfélagið. Fjölmargir aðilar víða um borgina hafa tekið þátt frá því að þetta fjölmenningarlega verkefni hóf göngu sína. Heill heimur af tungumálum er slagorð verkefnisins og markmiðið er að „afhjúpa” hið fjölbreytta tungumálalandslag.

Nánari upplýsingar um verkefnið veitir:

Kristín R. Vilhjálmsdóttir, verkefnastjóri fjölmenningar
kristin.r.vilhjalmsdottir@reykjavik.is | s. 411 6100