Um þennan viðburð
Tónleikar | Systur og Ateria
Vika vitundarvakningar um trans málefni stendur yfir frá 13.-19. nóvember.
Af því tilefni verður Borgarbókasafnið í Úlfarsárdal með dagskrá alla vikuna. Hápunktur vikunnar verða tónleikar þar sem tvær hljómsveitir stíga á stokk, Ateria og Systur.
Hljómsveitina Systur þarf vart að kynna en lag þeirra „Með hækkandi sól“ var framlag Íslands í Söngvakeppni evrópskra sjónvarpsstöðva fyrr á árinu. Hljómsveitina skipa systurnar Sigga, Beta og Elín og bróðir þeirra Eyþór.
Systur eru fæddar inn í mikla tónlistarfjölskyldu og hafa sungið og gert tónlist saman síðan áður en þær gátu talað saman. Dáleiðandi raddir þeirra blandast saman í harmóníur sem eru í senn hlýjar og töfrandi. Þær hafa lengi heillað Íslendinga með tónlist sinni sem samin hefur verið undir formerkjum hljómsveitarinnar Sísí Ey.
Systur trúa eindregið á lækningamátt tónlistarinnar og mikilvægi þess að styðja þau sem eru jaðarsett í samfélaginu en undanfarin ár hafa þær lagt mikla áherslu á réttindi trans barna.
Ateria er hljómsveit frá Reykjavík skipuð systkinunum Ásu og Eiri og frænku þeirra, Fönn. Hljómsveitin sigraði Músíktilraunir árið 2018 og hefur síðan spilað á fjölda tónlistarhátíða og tónleikum, svo sem Iceland Airwaves og Secret Solstice.
Í október 2021 gáfu þau út fyrstu plötuna sína, and_vari. Allir meðlimir hljómsveitarinnar hafa stundað bæði klassískt og rytmískt tónlistarnám til margra ára og er því tónlist hljómsveitarinnar fjölbreytt, en hefur þó verið lýst sem þjóðlaga-goth. Nafnið „Ateria“ er dregið af latneska heiti æðarfuglsins, Somateria mollissima, sem er sameiginlegt áhugamál allra hljómsveitarmeðlimanna.
Kl. 17:00: Ateria
Kl. 17:30: Systur
Öll velkomin!
Sjá fleiri viðburði tengda Viku vitundarvakningar um trans málefni hér fyrir neðan.
Nánari upplýsingar veitir:
Stella Sif Jónsdóttir, sérfræðingur | viðburðir og fræðsludagskrá
stella.sif.jonsdottir@reykjavik.is