Vá! Bækur, lesendur þeirra og allt hið voðalega í heiminum
Loftlagsbreytingar voru mál málanna á síðasta ári og börn og unglingar gjarnan leiðandi í þeirri umræðu. Á hinni árlegu ráðstefnu um barna- og unglingabókmenntir verður fjallað um birtingarmyndir loftslagsbreytinga og annarra erfiðra viðfangsefna samtímans í bókmenntum fyrir ungmenni. Einnig verður rýnt nánar í hvaða bækur standa börnum og unglingum til boða, hvaða hlutverki barna- og ungmennabækur gegna í breyttum heimi og hvernig miðla má efni, bæði í leik og í starfi, til ungra lesenda.
Ráðstefnan er opin öllu áhugafólki um íslenskar barna- og unglingabókmenntir. Þórey Lilja Benjamínsdóttir Wheat, grunnskólanemi ávarpar gesti. Hildur Knútsdóttir fjallar um hvernig sé að skrifa um samfélagsmál í ungmennabókum, Guðrún Lára Pétursdóttir flytur erindi um birtingarmyndir samfélagsvandamála í barnabókmenntum, Sævar Helgi Bragason talar um mikilvægi fræðibóka og Hjalti Halldórsson og Dögg Lára Sigurgeirsdóttir kynna nýjar kennsluaðferðir. Fundarstjórn er í höndum Bergrúnar Írisar Sævarsdóttur.
Engin skráning og ókeypis aðgangur.
Að ráðstefnunni standa Síung, Félag fagfólks á skólasöfnum, IBBY, SFS , Upplýsing og Borgarbókasafnið.
Dagskráin:
Þórey Lilja Benjamínsdóttir Wheat, grunnskólanemi flytur ávarp
Þórey talar frá sjónarhóli ungs lesenda; til dæmis um hversu erfitt geti verið að setjast niður og lesa þegar mikið sé að gera og um mikilvægi þess að fleiri erlendar bækur séu þýddar á íslensku.
10:45 Guðrún Lára Pétursdóttir, bókmenntafræðingur: Á báti yfir Hallærisplanið – um samfélagsgagnrýni og loftslagsvá í íslenskum ungmennabókum
Fyrsta íslenska unglingabókin, Búrið eftir Olgu Guðrúnu Árnadóttur, var rammpólitísk samtímasaga en það hvað strax við annan tón í bókunum sem fylgdu í kjölfar hennar þar sem samfélagsgagnrýnin var að mestu á bak og burt. Nú virðist hins vegar ýmislegt benda til þess að unglingabækur séu aftur að verða vettvangur pólitískrar umræðu, ekki síst um þau málefni sem tengjast loftslagsbreytingum.
11:15 Hildur Knútsdóttir, rithöfundur: Vetrarhörkur og nornir – að skrifa um samfélagsmál í ungmennabókum
Á að skrifa um samfélagsmál í bókum fyrir ungmenni? Eru bækur flóttaleið frá veruleikanum eða eru þær vettvangur til að fjalla um alvarleg og erfið málefni? Á síðustu árum hefur Hildur skrifað nokkrar ungmennabækur (Vetrarfrí, Vetrarhörkur, Doddi - bók sannleikans, Doddi - ekkert rugl!, Ljónið og Nornina) og í erindinu ræðir hún á hvaða hátt bækurnar taka á erfiðum málefnum.
11:45 Matarhlé
12:15 Sævar Helgi Bragason, dagskrárgerðarmaður og vísindamiðlari: Þessi bók er alltof flókin fyrir þig! - um mikilvægi fræðibóka fyrir börn
Í dag er sennilega nauðsynlegra en oft áður að miðla vísindum til barna og kveikja forvitni þeirra um heiminn í kringum okkur. Í erindinu verður stiklað á stóru um íslenskar fræðibækur og mikilvægi þess að lesa fjölbreytt.
12:45 Hjalti Halldórsson, kennari og rithöfundur og Dögg Lára Sigurgeirsdóttir, kennari: Að vera læs á framtíðina – Um mikilvægi sköpunar í skólastarfi.
Hjalti og Dögg Lára segja frá Smiðjunni í Langholtsskóla. Smiðjan er lífsstíll sem snýst um að gera nemendur að ábyrgum gerendum í sínu námi.
Fundarstjóri: Bergrún Íris Sævarsdóttir, rit- og myndhöfundur
Hér má nálgast viðburðinn á Facebook
Nánari upplýsingar veitir:
Maríanna Clara Lúthersdóttir
Verkefnastjóri – Bókmenntaviðburðir
marianna.clara.luthersdottir@reykjavik.is
S: 6952702