Um þennan viðburð
Leikhúskaffi | Moulin Rouge!
Leikhúskaffið er skemmtilegur viðburður fyrir öll sem hafa áhuga á leikhúsi og hefst á Borgarbókasafninu Kringlunni þar sem Brynhildur Guðjónsdóttir leikstjóri segir frá sýningunni Moulin Rouge! Í kjölfarið verður farið samferða yfir á Stóra svið Borgarleikhússins þar sem leikmyndin verður skoðuð og boðið upp á umræður og spurningar fyrir áhugasama. Gestum leikhúskaffis býðst 10% afsláttur af miðaverði á sýninguna sem verður frumsýnd þann 27. september. Hjólastólaaðgengi er á viðburðinum. Öll eru hjartanlega velkomin!
Um sýninguna:
Söngleikurinn Moulin Rouge! gerist í París 1899 þar sem söngvaskáldið Christian kemur til borgarinnar í leit að innblæstri. Honum er tekið opnum örmum af bóhemum Montmartre sem vinna að söngleik sem þá dreymir um að verði settur upp í næturklúbbnum Moulin Rouge – Rauðu Myllunni. Christian slæst í lið með þeim en verður ástfanginn af stjörnu Myllunnar – hinni óviðjafnanlegu Satine, sem heillast af skáldinu unga. En gildi bóhemanna um frelsi, fegurð, sannleik og ást mega sín lítils í heimi þar sem peningar ráða og allt er falt. Klúbburinn er í fjárhagsvandræðum og eigandinn Harold Zidler sér engan annan kost en að leita til hins forríka og harðsnúna greifa af Monroth, jafnvel þó það kosti að Satine sjálf verði hluti af kaupunum.
Leikstjóri íslensku uppfærslunnar er Brynhildur Guðjónsdóttir. Tónlistarstjóri er Jón Ólafsson og þýðing er í höndum Braga Valdimars Skúlasonar.Uppsetning Borgarleikhússins á Moulin Rouge! söngleiknum verður stórbrotin upplifun fyrir augu, eyru og hjarta. Öllu verður til tjaldað hvað varðar leik- og hljóðmynd og besta sviðslistafólk landsins fengið til að flytja okkur inn í grípandi heim Rauðu Myllunnar í París 1899 í sýningu sem á sér enga líka í íslensku leikhúsi!
Leikritið á vef Borgarleikhússins
Nánari upplýsingar veita:
Hólmfríður María Bjarnardóttir, sérfræðingur
holmfridur.maria.bjarnardottir@reykjavik.is | 411 6202
Emelía Antonsdóttir Crivello
emelia@borgarleikhus.is | 568 5500