Mikilvæg og marglaga rödd
Á Degi íslenskrar tungu, 16. nóvember, eru árlega veitt Verðlaun Jónasar Hallgrímssonar. Samkvæmt reglum mennta- og menningarmálaráðuneytisins ber þau að veita einstaklingum er hafa með sérstökum hætti unnið íslenskri tungu gagn í ræðu eða riti, með skáldskap, fræðistörfum eða kennslu og stuðlað að eflingu hennar, framgangi eða miðlun til nýrrar kynslóðar.
Verðlaunahafinn í ár er rithöfundurinn Gerður Kristný og óskum við henni innilega til hamingju!
Í rökstuðningi dómnefndar er Gerður Kristný sögð hafa mikilvæga rödd í íslensku samfélagi, ekki aðeins vegna þess hvernig hún segir hlutina heldur líka vegna efnistakanna. Gerður Kristný hefur komið við á hinum ýmsu vígvöllum bókmennta- og ritstarfa: Hún hefur sent frá sér ljóðabækur, skáldsögur, barnabækur, leikrit, ævisögu og starfaði auk þess lengi sem blaðamaður.
Gerður Kristný hefur í gegnum tíðina gefið þolendum kynferðisofbeldis rödd og fengið athygli fyrir, bæði meðan hún var ritstjóri Mannlífs en einnig með bók sinni Myndin af pabba - Saga Thelmu, ljóðabókinni Blóðhófni og ekki síst Sálumessu. Leikni hennar með ljóðformið hefur vakið athygli, bæði hér á landi og erlendis.
Verk hennar eiga þannig breiðan lesendahóp á öllum aldri, viðfangsefnin af ólíkum toga og framsetningin einnig. Á bókasafninu er hægt að nálgast marga titla úr smiðju Gerðar Kristnýjar eins og sjá má hér fyrir neðan.
Njótið!