Við byrjuðum árið 2023 á að leita að samstarfsaðilum til að þróa með okkur verkefni sem gæti stutt fólk í að draga úr sóun og útfæra með okkur fleiri útgáfur af deilihagkerfi bókasafnsins til að deila auðlindum. Aðgengi að tækifærum var einnig efni opins samtals. Háskólasamfélagið vildi heyra raddir þeirra sem þekkja af eigin raun hvernig það er að fóta sig innan menntakerfisins eftir að hafa sótt um alþjóðlega vernd eða flutt til Íslands af öðrum ástæðum.  Háskóli Íslands og Háskólinn á Akureyri vinna í sameiningu að því að koma á félagslegum hreyfanleika flóttafólks og innflytjenda. Stefnt er að því að hanna eins árs undirbúningsnám sem myndi opna aðgengi að háskólanámi. Markmið samtalsins var að tengjast innflytjendum og flóttafólki sem hefðu áhuga á háskólanámi. Upplýsingaflæði og mikilvægi stuðningshópa voru einnig rædd ásamt möguleikum á að þróa óformlegri og nýrri leiðir upplýsingamiðlunar á stöðum eins og bókasafninu. 

Stuðningur getur komið í ólíku formi. Í kjölfar fyrstu samtala hafði notandi samband og takk upp á að ræða fátækt í opnu samtali, þar sem þessu málefni fylgi mikil skömm og erfitt væri að sækja og veita stuðning til hópa fólks sem lifðu í fátækt. Samstaða með fólki sem glímir við fátækt var rædd og það hvernig bókasöfn, félagasamtök og góðgerðarfélög geti best tengst og stutt við bakið á fólki sem glímir við skort. Hvaða miðlunarleiðir eru bestar og hvernig samtök geta veitt gagnkvæman stuðning í þessum efnum til að ná til breiðari hópa var sérstaklega rætt. 

Sameiginlegar áskoranir og skapandi lausnaleit hófst með samtarfi við nágranna okkar í hafnar.haus. Arnar Sigurðsson og Anna Marjankowska leiddur okkur í gegnum skapandi lausnaleit sem byrjaði inni í almenningsrými bókasafnsins og var síðar færð yfir í stafræna vídd Hugmyndaþorpsins.  Í samtalinu á bókasafninu veltu þátttakendur fyrir sér hvað gæti talist sem hlutlaust tungumál í fjölbreyttu starfsumhverfi, samtalið hélt svo áfram á stafræna vettvangi Hugmyndaþorps. Markmið viðburðarins var að leita að leiðum til að opna fyrir fleirum aðgengi að samfélagi og að öll upplifi sig velkomin þrátt fyrir ólíka tungumálaþekkingu. Í samtalinu var kannað hvernig hið staðbundna samtal gæti verið skrásett í stafrænni vídd til að tengja fleiri hagaðila við samtalið og prófa sig áfram í aðferðafræði lýðræðisumræðu.  

Á seinni hluta ársins beindist athyglinni að félagslegum og efnislegum grunnþörfum. Hvernig er aðgengi jaðarsettra hópa að styðjandi samfélagi? Hvernig upplifir fólk að vera virkir meðlimir í verkalýðsfélagi og taka þátt í verkfallsaðgerðum? Gætu almenningsrými eins og bókasöfn verið vettvangur samstöðu verkafólks fyrir bættum kjörum? Ekki einungis stuðningur við meðlimi verkalýðsfélaga var rædd heldur starfsaðstæður sjálfstætt starfandi listafólks og skapandi hópa í borginni. Getur borg verið skapandi pláss án þess að skaffa aðgengileg rými fyrir skapandi geirann? Ef við byggjum við skilyrðislausan stuðning eins og borgarlaunum til að mæta grunnþörfum okkar, hverju myndi það breyta? Hefðum við aðrar venjur? Myndum við nýta okkur almenningsrými eins og bókasöfn með öðrum hætti ef við hefðum meiri tíma til að hlúa að því sem er okkur kærast? Við höldum áfram að endurhugsa hlutverk okkar sameiginlegu rýma og hvernig við getum skapað stað sem styður við ólíka hópa. 

Við þökkum kærlega öllum þeim sem settu málefni á dagskrá og lögðu til umræðunnar.  

Viltu vita meira um Opið samtal? Þetta er vettvangur fyrir heiðarleg og opin samskipti. Hér könnum við ólík samræðuform og í sameiningu lærum við nýjar leiðir til að ræða málefni sem standa okkur nærri.      

Frekar upplýsingar    
Dögg Sigmarsdóttir    
Verkefnastjóri | Borgaraleg þátttaka    
dogg.sigmarsdottir@reykjavik.is