BORGARBÓKASAFNIÐ
Kormákur Logi Bergsson, sumarstarfsmaður á Borgarbókasafninu Gerðubergi og nemi í málvísindum, er þessa dagana að lesa bókina The Magician's Assistant eftir Ann Patchett.
Hann segir fyrrverandi kærustu sína og nánustu vinkonu hafa kynnt sig fyrir höfundinum og þau hafi hlustað á bækur hennar Tom Lake og The Dutch House á ferðum sínum um landið. Hún sé sú manneskja sem hefur haft hvað mest áhrif á lesturinn hans og lestraráhuga, þau hafi lesið mikið saman og hann eigi margar bækur sem hún hafi mælt með að hann lesi. Þar á meðal er Veisla í farángrinum eftir Hemingway, Call Me by Your Name eftir Aciman, Rúmmálsreikningarnir hennar Solvej Balle, Small Things like These eftir Claire Keegan og Þú sem ert á jörðu eftir Nínu Ólafsdóttur.
Kormákur segir óhætt að segja að Patchett sé í hópi sinna uppáhaldshöfunda en viðurkennir að sá hópur sé ekki ýkja fjölmennur. Í honum séu þó einnig Þórbergur Þórðarson, Auður Ava Ólafsdóttir, Robert Stanek og kannski George R. R. Martin.
„Mér finnst Patchett samt einstök. Persónurnar hennar eru ljóslifandi og lífið sem þær lifa á blaðsíðum bókanna hennar hefur svo mikið aðdráttarafl og sannfæringarkraft að manni hálf-líður eins og maður gæti farið og heimsótt þær. Flogið til Michiganfylkis og heimsótt kirsuberjabúgarð Löru eða sveitaleikhúsið við stöðuvatnið úr Tom Lake eða farið að skoða ættaróðal Conroy-systkinanna úr The Dutch House.“
Aðspurður hvort leslistinn fyrir sumarið hafi verið langur segir Kormákur Logi listann svo langan að enginn kæmist yfir hann nema fuglinn fljúgandi.
„Ég hafði samt hugsað mér að í sumar myndi ég gera eins og mér er sagt. Leyfa þeim bókum sem mín nánustu mæla helst með að hafa forgang fram yfir aðrar. Pabbi ryksugaði í sig Kurt Vonnegut á mínum aldri og mælir alltaf með bókunum hans, enda í miklu uppáhaldi hjá honum. Án undantekningar, þegar skáldið kemur við sögu heima hjá mömmu og pabba, segir pabbi frá því þegar munaði mjóu að hann yrði Kurt Vonnegut að bana -- ók manninn næstum niður á Suðurgötunni í september 1987. Vonnegut var í heimsókn á vegum Bókmenntahátíðar í Reykjavík og hefur sennilega verið í göngutúr þarna í grendinni. Pabbi mun alltaf sjá eftir því að hafa ekki drepið á bílnum, hlaupið út, afsakað morðtilræðið og loks þakkað Vonnegut fyrir gjöfina sem skrifin hans voru. Pabbi segir að bókin Breakfast of Champions yrði sennilega góður upphafspunktur.“
Móðir Kormáks Loga er einnig dugleg að mæla með bókum fyrir hann að lesa og þessa dagana eru það helst bækur eftir Hallgrím Helgason og Steinunni Sigurðardóttur.
„Hún hefur, svo ég viti, hvorki keyrt á Hallgrím eða Steinunni á Suðurgötunni í september en það er kannski kominn tími til ... kominn tími til að ég lesi Tímaþjófinn eða Sextíu-kílóa-bækurnar þ.e.a.s.“
Á leslista sumarsins voru einnig nokkrar fræðibækur tengdar námi Kormáks Loga sem segist hafa brunnið fyrir málvísindum síðan hann var lítill snáði, Bláa bókin eftir Wittgenstein, Mál og mannshugur eftir Chomsky, Simpler Syntax eftir Jackendoff og fleiri.
„Mér mun nú eflaust ekki takast að lesa þetta allt en ég er a.m.k. byrjaður á Patchett og Wittgenstein,“ segir Kormákur Logi sem telur tvo upphafspunkta góða fyrir þau sem langar að kafa inn í heim Patchett.
„Tom Lake er dásamleg fyrstu kynni af hennar stíl. Sögusviðin eru í raun tvö. Ytra sögusviðið er kirsuberjabúgarður í Michiganfylki á tímum Covid. Innra sögusviðið, og meginþorri bókarinnar, eru sokkabandsár Löru. Bókin er gjörsamlega dásamleg. Meira segi ég ekki. Annar góður upphafspunktur er sennilega Bel Canto sem er jafnframt frægasta bókin hennar. Ég hef ekki lesið hana sjálfur.“
Hér fyrir neðan má finna lista yfir þær bækur sem Kormákur mælir með og til eru hjá Borgarbókasafni.
Hér má finna frekari upplýsingar um bókakost Borgarbókasafnsins.
Á frídögum er upplagt að kíkja við á Borgarbókasafninu og byrgja sig upp af bókum, plötum, spilum eða öðru skemmtilegu til að skella með í ferðatöskuna eða njóta heima við í rólegheitum. En hvað er sniðugt að taka með úr öllum þeim gersemum sem safnið geymir? Í greinaröðinni Ég fer í fríið leitum við ráða hjá starfsfólki safnsins og biðjum það að mæla með einhverju góðu úr safnkostinum til að taka með í fríið.