Vinir og elskhugar (100x200)

Um þennan viðburð

Tími
17:00 - 18:00
Verð
Frítt
Hópur
Fullorðnir
Sýningar
Welcome

Vinir og elskhugar // Friends and Lovers

Fimmtudagur 15. ágúst 2019 - Sunnudagur 15. september 2019

Vinir & elskhugar er yfirskrift málverkasýningar Dagmarar Agnarsdóttur í Menningarmiðstöðinni Gerðubergi 15. ágúst–15. september. Þar sýnir Dagmar olíumálverk sem flest eru frá þessu ári og því síðasta. Þetta verður fyrsta einkasýning hennar í rúmlega þrjú ár.

Sýningin Vinir & elskhugar hefst á nýju tungli kl. 17 fimmtudaginn 15. ágúst. Björgvin Gíslason gítarleikari verður á staðnum og ljær opnuninni sinn kynngimagnaða blæ. Verið öll velkomin!

Myndefni og innblástur sækir Dagmar sem fyrr í fólk og fyrirbæri – fólk í daglega lífinu og stöðu þess í heimi í deiglu: stöðu mannsins í nútímanum og vangaveltur um þann heim sem núlifandi kynslóðir eftirláta afkomendum sínum.

Dagmar Agnarsdóttir er fædd og uppalin í Reykjavík en bjó um margra ára skeið í ýmsum löndum þriðja heimsins. Hún fór að fást við myndlist fyrir alvöru á meðan hún bjó ásamt fjölskyldu sinni í Asíu og Afríku þar sem hún lagði stund á nám og vinnu með þarlendum listamönnum og hélt sýningar. Dagmar hefur þróað sérstakan stíl sem vakið hefur athygli þar sem hún hefur unnið og sýnt verk sín. Stundum blandar hún hrjóstrugri íslenskri náttúru og daglegum íslenskum veruleika (og óveruleika) saman við menningaráhrif frá Asíu og Afríku þar sem ólíkir menningarheimar renna saman og mynda ómótstæðilega og töfrandi heild. Dagmar hefur einnig fengist við myndskreytingar bóka. Þegar hún er ekki að mála keppir Dagmar á alþjóðavettvangi í kraftlyftingum og á sem stendur 24 Íslandsmet í greininni. Dagmar Agnarsdóttir er félagi í SÍM, Sambandi íslenskra myndlistamanna.

Info in English on Facebook