Stofan | Þægileg þögn
Pétur Eggertsson býður þér inn í sína Stofu | A Public Living Room. Hér getur þú leikið þér í tónlistarheiminum sem hann hefur komið fyrir á 5. Hæð í Grófinni. Þetta er þriðja útgáfa Stofunnar á öðru starfsári verkefnisins. Í viðtalinu færðu að vita meira um þróunarferli Pétur fyrir hans Stofu.
Hvenær er þögn þægileg? Hvernig skilgreinum við óþægilega, eða vandræðalega þögn? Týpíska bókasafnsþögnin… hverskonar þögn er það?
Saman getum við skapað þægilega þögn: óþvingaða og tillitssama en að sama skapi áhugaverða og ánægjulega fyrir eyru, huga og sál. Frjálslega og leikandi þögn þar sem við gefum smáum hljóðum gaum og hjálpum þeim að þróast í stef og hryn. Hljóðfæri eru oft falin og í dulargervi sem hversdagslegir hlutir, marga hverja sem hægt er að finna á bókasafni. Finnum þau - kynnumst þeim - prófum þau. Eftir smástund venjumst við hljóðfærunum okkar og finnum þægindin í hljóðunum… og þögninni. Við verðum að stíga út fyrir þægindarammann okkar til þess að finna nýja ramma, finna jafnvægi í þægindum.
Verið hjartanlega velkomin í þægilega þagnarstund í Stofunni á Borgarbókasafninu.
Komið, við hittumst við plöturnar á 5. hæð!
Um Stofuna
Mánaðarlega er ný útgáfa af Stofunni sköpuð, sem er tímabundið rými innan bókasafnsins. Áhersla er lögð á að kanna leiðir til að miðla óháð tungumálum. Í Stofunni er hægt að upplifa bókasafnið samkvæmt reglum sem skapendur rýmisins setja því.
Nánari upplýsingar veitir:
Martyna Karolina Daniel, sérfræðingur fjölmenningarmála
martyna.karolina.daniel@reykjavik.is