Nælið ykkur í Laufeyjar-kort 23. ágúst

Sunnudaginn 23. ágúst er hinn árlegi Laufeyjardagur, A Very Laufey Day haldinn hátíðlegur víða um heim. Að því tilefni geta aðdáendur Laufeyjar nálgast sérstök Laufeyjar-bókasafnskort á Borgarbókasafninu Grófinni. 

Kortin eru lestrarhvetjandi samstarfsverkefni Borgarbókasafnsins og bókaklúbbs Laufeyjar, The Laufey Book Club, sem Laufey heldur úti á Instagram við miklar vinsældir.

Í bókaklúbbnum deilir Laufey sínum uppáhaldsbókum og verður úrvali þeirra stillt út á eftirfarandi söfnum í tilefni dagsins:

• Borgarbókasafninu Grófinni
• Borgarbókasafninu Kringlunni
• Borgarbókasafninu Sólheimum
• Borgarbókasafninu Úlfarsárdal

Hvernig virka Laufeyjar-bókasafnskortin?

Laufeyjar-bókasafnskortið virkar alveg eins og hefðbundið bókasafnskort.

Árgjald fyrir bókasafnskort hjá Borgarbókasafninu er 3.300 kr. Það sama gildir um Laufeyjar-kortið.

• Þau sem vilja skipta gamla bókasafnskortinu í Laufeyjar-kort greiða 1.500 kr.  
• Gildir á öllum söfnum Borgarbókasafnsins.
• Átján ára og yngri og 67 ára og eldri greiða ekki fyrir bókasafnskort.

Kíktu við á Borgarbókasafninu Grófinni 23. ágúst ef þig langar að eignast Laufeyjar-kort eða ef þig vantar tillögur að áhugaverðu lesefni. Kortin verða einnig áfram í boði á hinum söfnunum meðan birgðir endast.

Nánari upplýsingar um bókasafnskort hjá Borgarbókasafninu má nálgast hér.