BORGARBÓKASAFNIÐ
Allar upplýsingar um make-a-thek verkefnið.
Vertu með í skemmtilegri smiðju þar sem þú munt læra að prenta mynstur á efni með blómum og öðrum plöntum. Við munum notfæra okkur japanska aðferð sem kallast „Tataki-zomé“.
Við munum safna blómum í nágrenni Gerðubergs og „hamra“ þau á efnið og þannig skapa einstök mynstur. Þessi umhverfisvæna prentaðferð er fullkomin leið til þess að fagna komandi sumri. Allt efni er á staðnum en þátttakendur eru hvattir til þess að mæta með hamar og blóm úr sínum eigin garði. Hægt er að nota öll lituð blóm.
Smiðjan er leidd af Christalena Hughmanick en hún er listamaður og kennari búsett í Reykjavík. Í verkum sínum leggur hún áherslu á að skapa samfélag í gegnum kennslu og sameiginlega reynslu, og skoðar með þeim samtal milli listamanns og áhorfanda og á milli neytanda og framleiðanda. Þessar félagslegu aðferðir þróaði hún þegar hún stundaði meistaranám við School of the Art Institute of Chicago (2010-12). Hún nálgast verkin sín með fræðilegum hætti út frá menningarfræðilegum sjónarhornum með áherslu á að varðveita þekkingu og aðferðir sem gætu glatast, s.s. bútasaum og náttúrulitun. Verk hennar eru knúin áfram af djúpum tengslum milli kvenna, náttúru og sköpunar. Tengsl sem hún vill færa inn í stærra samtal innan listheimsins.
Smiðjan fer fram á ensku.
Borgarbókasafnið Gerðubergi er þátttakandi í alþjóðlegu verkefni til þriggja ára sem nefnist make-a-thek. Markmiðið með þessu verkefni er að skapa vettvang fyrir skapandi og framsækna neytendur (prosumer) þar sem þekkingu er deilt og við lærum í sameiningu nýjar aðferðir t.d. við að gera við textíl, og kynnumst allskyns handverki og aðferðum. Þetta er ferðalag og áfangastaðurinn mótast með þátttöku sem flestra. Verkefnið er styrkt af Evrópusambandinu. Sjá https://www.makeathek.eu/
Nánari upplýsingar veitir:
Atli Pálsson, sérfræðingur
atli.palsson@reykjavik.is | 411-6170