Jóladagatal Borgarbókasafnsins
Gréta Þórsdóttir Björnsson og Halldór Snorrason

Höfundar jóladagatals Borgarbókasafnsins og Bókmenntaborgarinnar 2019

Valnefnd hefur nú lokið við að fara yfir þær 13 umsóknir sem bárust um Jóladagatal Borgarbókasafnsins og Bókmenntaborgarinnar 2019.

Sagan Jólaálfurinn sem flutti inn varð fyrir valinu en hún er skrifuð af Grétu Þórsdóttur Björnsson og Halldór Snorrason teiknar myndirnar. 

Í umsögn valnefndar segir: 

„Sagan Jólaálfurinn sem flutti inn er falleg jólasaga og skemmtilega myndskreytt. Í sögunni er spennandi ráðgáta og hún er jafnframt fyndin og miðlar fróðleik um jólin, bæði íslenskum og dönskum. Sagan hentar breiðum hópi barna og fullorðnir ættu að hrífast af henni líka og því er Jólaálfurinn sem flutti inn kjörin saga fyrir fjölskyldur að lesa saman á aðventunni.“ 

Og hver eru Gréta og Halldór? Þau höfðu þetta að segja:

„Halldór er með mastersgráðu í hönnun, nánar tiltekið production design. Þetta er ekki í fyrsta sinn sem hann vinnur að jóladagatali, því hann kom að jóladagatalinu Tinkas juleeventyr sem var sýnt á TV2 í Danmörku 2017. Og hann kom einnig að framhaldinu sem kemur í ár. Halldór sést stundum á götum bæjarins á stórglæsilegu hlaðhjóli, sem hann hefur lagt mikla ástúð við. Þegar hann er ekki að hjóla, flýgur hann dróna og þrívíddarprentara. Þegar Halldór var að alast upp átti hann vin á bókasafninu í Sólheimum, bókavörð sem hjálpaði honum að finna allar Bob Moran bækur landsins.
Gréta er menntuð arkitekt frá Árósum með sérhæfingu í byggingararfi og sjálfbærni. Hún elskar handbolta og Danmörku, enda hefur hún búið þar í 14 ár. Hún er samt alveg að venjast Íslandi aftur, sérstaklega sundlaugum, lakkrís og að hafa fjölskylduna í seilingarfjarlægð.
Hún var fastagestur á bókasafninu sem barn og unglingur og tjékkaði oft yfir 10 bækur út á viku. 
Saman hafa þau baukað ýmislegt, t.d. ferðast um Evrópu og stýrt veftímariti um hönnun og arkitektúr. Upp á síðkastið hafa þau mest verið í að sinna barnauppeldi.“


Við þökkum öllum umsækjendum fyrir þann áhuga sem þeir sýndu verkefninu. 

Nánari upplýsingar um Jóladagatalið veitir:

Guðrún Elísa Ragnarsdóttir, deildarbókavörður
gudrun.elisa.ragnarsdottir@reykjavik.is

fim, 19-09-2019 16:14
Flokkur