Ljóðaslamm 2023 | Sviðið er þitt | ATH. Framlengdur umsóknarfrestur


Ljóðaslammið er komið aftur eftir nokkurt hlé og við leitum að þátttakendum á aldrinum 15-25 ára!

Umsóknarfrestur er til og með 24.janúar 2023

Ljóðaslamm hefur verið reglulegur og vinsæll viðburður á Borgarbókasafninu í gegnum tíðina. Þekkt skáld, tónlistarfólk og sviðslistafólk hafa stigið sín fyrstu skref í Slamminu, enda er ljóðaslamm, eða Poetry Slam, listform sem útfæra má á fjölbreyttan máta.

Hvað er ljóðaslamm?
Ljóðaslamm felst í flutningi frumsamins ljóðs, þar sem áherslan er ekki síður á flutninginn en á ljóðið sjálft. Þannig telst hefðbundinn ljóðaupplestur ekki til ljóðaslamms, heldur er áherslan á ljóðaflutning sem sviðslist. Sjá ljóðaslömm fyrri ára hér.

Upplýsingar fyrir umsækjendur

  • Ljóðaslammið er opið bæði fyrir einstaklinga og hópa á aldrinum 15-25 ára.
  • Minnisblað er leyfilegt á sviði.
  • Ljóðið þarf að vera frumsamið af flytjanda eða öðrum á sviðinu.
  • Ljóð má taka hámark 3 mínútur í flutningi.
  • Ljóð má vera á íslensku eða ensku.
  • Umsóknarfrestur er til og með 24.janúar 2023.

Hvernig sæki ég um þátttöku?
Þú sendir inn umsókn með drög að hugmynd um hvernig atriðið verður flutt á netfangið: ljodaslamm@borgarbokasafn.is.

Í umsókninni þarf að koma fram

  • Nafn flytjanda
  • Aldur
  • Hugmynd að atriði / flutningi

 

Hvar og hvenær?

Ljóðaslamm 2023 verður haldið föstudaginn 3. febrúar í Borgarbókasafninu Grófinni.
Nánari tímasetning auglýst síðar.

Dómnefnd
Í dómnefnd eru þau Steinunn Jónsdóttir (úr Reykjavíkurdætrum), Jón Magnús Arnarsson (vinningshafi Ljóðaslamms 2017) og Örvar Smárason (rithöfundur og meðlimur hljómsveitanna FM Belfast og MÚM).

Kælan mikla sigraði Ljóðaslamm Borgarbókasafnsins árið 2013 svo þær eiga tíu ára afmæli þegar næsta Ljóðaslamm verður haldið. Á þessum áratug hefur ýmislegt á daga þeirra drifið, en sveitin hefur meðal annars spilað á hátíðum í Evrópu og Bandaríkjunum og hitað upp fyrir Robert Smith í The CurePixiesPlacebo og frönsku post-metal sveitina Alcest.

Úr viðtali sem birtist í Fréttablaðinu 2013, eftir sigurinn: Að sögn söngvarans Laufeyjar Soffíu var Kælan mikla stofnuð í kringum keppnina. Sólveig er mjög mikið í því að semja. Við vorum að leika okkur að spila saman og hún var búin að skrá sig í keppnina en vissi ekki hvað hún ætlaði að gera. Okkur fannst það koma vel út að flytja ljóðin hennar saman, segir hún. Það getur vel verið að við höldum áfram að semja við ljóðin hennar eftir þetta. Aðspurð segir Laufey Soffía sigurinn hafa komið þeim á óvart. Já, þetta var rosalega skemmtilegt.

Kæluna miklu skipa þær Laufey Soffía, Margrét Rósa Dóru-Harrysdóttir og Sólveig Matthildur Kristjánsdóttir.

(Ljósmynd: Magnús Andersen)