Algengar spurningar

Ef þér finnst vanta svör við einhverjum spurningum hér, sendu endilega ábendingu á brjann.birgisson@reykjavik.is.

Hvað kostar skírteini?

Skírteini kostar 2.000 kr. á ári en börn og unglingar undir 18 ára aldri, eldri en 67 ára og öryrkjar þurfa ekki að greiða fyrir þau.
Bókasafnsskírteini eru innifalin í Menningarkortum, en þau gilda einnig á Listasafn Reykjavíkur og Minjasafn Reykjavíkur. Sjá nánar um Menningarkortin á menningarkort.is.

Má ég nota skírteini einhvers annars eða má ég lána skírteinið mitt?

Skírteini Borgarbókasafns eru gefin út á einstakling og er óheimilt að nota skírteini annarra. Eigandi skírteinis ber ábyrgð á öllu efni sem tekið er á skírteinið.

Hvað er gildistími skírteinis langur og hvar get ég notað það?

Gildistími skírteina er eitt ár. Skírteinið gildir í öllum söfnum Borgarbókasafns sem og í Bókasafni Seltjarnarness og Bókasafni Mosfellsbæjar.

Hver er útlánstími gagna?

Útlánstími gagna er mismunandi en bækur eru að jafnaði lánaðar út í 30 daga, tónlist í 2 vikur, kvikmyndir í 4 daga og annað myndefni í viku.

Get ég séð á netinu hvað gögn ég er með í láni?

Já. Allir fá úthlutað leyniorði þegar þeir fá skírteini til að skrá sig inn á leitir.is. Þar er hægt skoða útlánasögu, gögn í láni, skiladag, endurnýja lán og panta bækur og annað efni, sem er í útláni.

Hversu háar eru sektir?

Upplýsingar um sektir má sjá í gjaldskrá.

Kemst ég á netið í Borgarbókasafninu?

Aðgangur er að tölvum og internetinu í öllum söfnum Borgarbókasafnsins gegn vægu gjaldi.

Einnig eru heitir reitir í öllum söfnum Borgarbókasafnsins og geta gestir því komið með fartölvur sínar og komist frítt á netið.

Hvað gerist ef ég týni eða skemmi efni sem ég er með í láni?

Greiða þarf fyrir gögn sem glatast eða skemmast í meðförum lánþega. Viðmiðunargjald fyrir glötuð eða ónýt gögn má sjá í gjaldskrá.

Er hægt að framlengja lán?

Allir fá úthlutað leyniorði þegar þeir fá skírteini.til að skrá sig inn á leitir.is. Þar er hægt að skoða útlánasögu, gögn í láni, skiladag, endurnýja lán og panta bækur og annað efni, sem er í útláni. Einnig er hægt að framlengja lán með því að koma eða hringja á söfn Borgarbókasafns.

Hvar er hægt að sjá hvað er til í Borgarbókasafninu?

Safnkostur Borgarbókasafns er aðgengilegur á leitir.is. Hægt er að leita í gagnsafninu af heimasíðu Borgarbókasafnsins eða beint á leitir.is og komast að hvort ákveðin bók, diskur, mynd eða annað sé inni.

Er hægt að panta bækur eða annað efni?

Hægt er setja pöntun á bækur og önnur gögn með því að fara inn á „mínar síður“ á leitir.is. Athugið að einungis er hægt að setja pöntun á þau gögn sem eru í útláni. Ef bókin eða gagnið er inni er nauðsynlegt að hringja í söfn Borgarbókasafns og biðja um að bókin eða gagnið sé tekið frá. Ef bókin eða gagnið er ekki til í því safni sem er næst er hægt að fá sent milli safna Borgarbókasafns sem og Bókasafns Seltjarnarness og Bókasafns Mosfellsbæjar.

Er lesaðstaða í Borgarbókasafninu?

Það er hægt að tylla sér niður í stóla og sófa á ýmsum stöðum í söfnum Borgarbókasafnsins og einnig eru skrifborð sem nota má til lesturs og náms á 2. og 5. hæð í aðalsafni, Tryggvagötu 15.

Hvað er hægt að fá að láni í Borgarbókasafninu?

Í söfnum Borgarbókasafnsins er fjölbreytt úrval bóka, tímarita, tónlistar, kvikmynda, tungumálanámskeiða og annars fyrir alla aldurshópa. Auk þess er hægt að leigja eða kaupa myndlist eftir íslenska listamenn í Artóteki Borgarbókasafnsins, sem er í aðalsafni, Tryggvagötu 15. Leigan er frá 1.000 kr. og upp í 10.000 kr. á mánuði. Listaverkin má leigja þar til þau eru að fullu greidd eða ljúka greiðslu fyrr og dregst þá frá áður greidd leiga. Nánari upplýsingar um útlán, verkin og listamennina er að finna á artotek.is.

Tökum við á móti bókagjöfum?

Nei, því miður getum við ekki tekið við bókagjöfum.