Um Gerðuberg

Í Gerðubergi hefur verið starfrækt fjölbreytt og lífleg starfsemi frá árinu 1983. Í byrjun árs 2015 var Menningarmiðstöðin Gerðuberg og Borgarbókasafn Reykjavíkur sameinað undir einn hatt. Þar með breyttist heiti stofnunarinnar í Borgarbókasafnið | Menningarhús Gerðubergi og heiti starfsstaða Borgarbókasafnsins í hverfum borgarinnar tók sambærilegum breytingum.

Í Gerðubergi er umfangsmikil starfsemi; bókasafn, fjölbreytt viðburða- og sýningahald og félagsstarf. Salir og fundarherbergi eru leigð út auk þess sem ýmis félagasamtök og sjálfsprottnir hópar hafa aðstöðu í húsinu til lengri eða skemmri tíma. Á efri hæð hússins er rekið kaffihúsið Cocina Rodrígues þar sem boðið er upp á léttan hádegismat og kaffiveitingar fyrir gesti og gangandi. 

Bókasafnið
Safnið er afar bjart og rúmgott. Þar er góð lestraraðstaða og aðstaða til að tylla sér niður og lesa nýjustu tímaritin og dagblöðin. Barnadeild safnsins er rúmgóð og hlýleg. 
Hægt er að panta sögustundir. leiðsagnir um sýningar og safnkynningar fyrir börn. Í safninu eru barnabækur á fjölmörgum erlendum  tungumálum. 
Í unglingadeildinni  er fjölbreyttur safnkostur fyrir ungt fólk, bæði bækur og tímarit.
Safnkostur í Gerðubergi er af ýmsum toga. Fyrir utan bækur og tímarit má nefna hljóðbækur, dvd-myndir, tónlist, margmiðlunarefni og tungumálanámskeið.
Gestir safnsins geta fengið aðgang að tölvum gegn vægu gjaldi.

Viðburðadagskrá og sýningar
Í Gerðubergi er boðið upp á fjölbreytta dagskrá árið um kring. Myndlistarsýningar, tónleika, bókmenntaviðburði, barna- og fjölskyldudagskrá, fræðslu af ýmsum toga og margt fleira. Upplýsingar um viðburðadagskrána er að finna HÉR á heimasíðunni. Gestir geta einnig skráð sig á póstlista hér eða fylgst með dagskránni á fésbókarsíðum safnsins.

Umsóknir um sýninga- eða viðburðahald skal senda á gerduberg@reykjavik.is. Smellið HÉR til að hlaða niður umsóknareyðublöðum fyrir sýningarhald og HÉR til að hlaða niður umsóknareyðublöðum fyrir samstarf um viðburðahald.

Salaleiga 
Í Gerðubergi er fjölbreytt og góð aðstaða fyrir fundi, námskeið, ráðstefnur, viðburði og veislur. Einnig er góð aðstaða í svokölluðum speglasal fyrir hreyfingu af ýmsu tagi. Smellið HÉR til að skoða yfirlit yfir sali og fundarherbergi ásamt verðskrá.
Allur almennur tækjabúnaður er til staðar, s.s. tölva, skjávarpi og hljóðkerfi og í húsinu er þráðlaust net. Veitingar skal panta hjá rekstraraðilum kaffihússins. Einnig er boðið upp á ljósritunarþjónustu fyrir viðskiptavini.
Gerðuberg leitast við að sinna viðskiptavinum sínum og gestum sem best. Nánari upplýsingar veitir Guðlaug P. Sigurbjörnsdóttur, upplýsinga- og þjónustustjóri á skrifstofu Gerðubergs í síma 411 6186, netfang: gudlaug.sigurbjornsdottir@reykjavik.is. Skrifstofan er opin virka daga kl. 8.00-16.00.

Kaffihúsið Cocina Rodríguez
Kaffihúsið Cocina Rodríguez í Gerðubergi er rekið af Evelyn Rodrígues og Óla Geir Jóhannessyni. Þar er boðið upp í heitan mat í hádeginu alla virka daga og einnig á laugardögum. Einnig gott sérlagað kaffi og girnilegt meðlæti. Sjá nánar HÉR.

 

  • Um Gerðuberg