Myndasögusamkeppni 2016

  • Poison Ivy - Mynd eftir Meghan Stratman

Eitraðar konur – Poison Ivy

Borgarbókasafn Reykjavíkur og Myndlistaskólinn í Reykjavík í samstarfi við Nexus standa fyrir myndasögusamkeppni og -sýningu fyrir fólk á aldrinum 10-20+ ára.

Sýningin verður á Reykjavíkurtorgi í Borgarbókasafninu í Grófinni, Tryggvagötu 15. Hún verður opnuð laugardaginn 30. apríl kl. 15.00 og stendur út maímánuð. Við opnun sýningarinnar verða úrslit samkeppninnar tilkynnt og verðlaun afhent við hátíðlega athöfn.

Þetta er í áttunda sinn sem samkeppnin / sýningin er haldin.

Eins og tíðkast hefur er samkeppnin helguð tiltekinni myndasöguhetju og -þema. Árið 1966 birtist í fyrsta sinn háskakvendið og umhverfisverndarsinninn Poison Ivy og velgdi Batman undir uggum. Þetta flagð undir fögru skinni fagnar því fimmtíu ára afmæli árið 2016. Þemað að þessu sinni er „Eitraðar konur“.

Dómnefnd skipa Sunna Sigurðardóttir teiknari, Sirrý (Margrét Lárusdóttir) myndasöguhöfundur og Björn Unnar Valsson bókmenntafræðingur.

Miðað er við að hámarkslengd efnis sé tvö A4 blöð eða ein síða í A3 (öðru megin) og eru þátttakendur beðnir um að nota frekar þykkan pappír en ekki venjuleg fjölritunarblöð til að tryggja að verkin verði fyrir sem minnstu hnjaski í upphengingu. Vinnuaðferðin er algerlega frjáls og verkin geta hvort sem er verið myndasaga eða stök mynd með myndasöguþema eða mynd sem tengist myndasögum á einhvern hátt.

Þátttakendur skili verkunum á Borgarbókasafnið í Grófinni, Tryggvagötu 15, í umbúðum merktum: „Eitraðar konur 2016“. Síðasti skiladagur er 13. apríl 2016. Vinsamlega athugið að láta fylgja fullt nafn, fæðingarár, símanúmer og tölvupóstfang.

Upplýsingar veitir Björn Unnar Valsson, bjorn.unnar.valsson [at] reykjavik.is. Einnig má hringja í síma 4116100.