Borgarbókasafnið hefur útlán á raf- og hljóðbókum í samvinnu við Landskerfi bókasafna

  • Borgarbókasafnið hefur hafið rafræn útlán.

Borgarbókasafnið hefur hafið útlán raf- og hljóðbóka í samvinnu við Landskerfi bókasafna. Með þessari nýjung geta notendur bókasafnsins nálgast fjölda titla hljóð- og rafbóka á auðveldari hátt en hingað til. Fyrst um sinn verður safnkostur einkum á ensku en vonast er til þess að íslenskir titlar bætist fljótlega við.

Það eina sem fólk þarf til að nálgast efni er gilt bókasafnsskírteini hjá Borgarbókasafninu. Fjölmargir efnisflokkar standa lánþegum til boða, líkt og í hefðbundnu bókasafni. Þar er að finna spennusögur, ævisögur, efni fyrir börn og margt fleira þannig að allir ættu að finna þar eitthvað við sitt hæfi. Lánþegar geta jafnframt sent  Borgarbókasafninu innkaupabeiðnir.

Hægt verður að nálgast efnið í flestum tækjum svo sem  í vafra í tölvum, spjaldtölvum og snjallsímum. Auk þess er efnið jafnframt aðgengilegt í gegnum sérstakt app, OverDrive sem finna má í App Store og Play Store. 

Borgarbókasafnið verður fyrsta bókasafnið til að hefja rafbókaútlán en ráðgert er að fleiri almenningsbókasöfn fylgi í kjölfarið áður en langt um líður. Verkefnið hefur fengið heitið Rafbókasafnið.  Landskerfið  er ábyrgt fyrir kerfislegum þáttum verkefnisins, en Borgarbókasafnið sér um bókakaup og notendaþjónustu.

Þjónustan er veitt í gegnum OverDrive rafbókaveituna og er gjaldfrjáls fyrir notendur sem eiga bókasafnsskírteini í Borgarbókasafninu. Slóðin að Rafbókasafninu er https://rafbokasafn.is

Einnig má finna efni Rafbókasafnsins á Leitir.

Leiðbeiningar um innskráningu í Rafbókasafnið.