Bókakaffi | Allt sem segja þarf

Allt sem segja þarf, Óskar Árni Óskarsson, Guðmundur Andri Thorsson, Bókakaffi í Gerðubergi

Bókakaffi | Allt sem segja þarf

Menningarhús Gerðubergi, miðvikudag 22. mars kl. 20 - 22

Á Bókakaffi í mars koma saman þeir Guðmundur Andri Thorsson og Óskar Árni Óskarsson og ræða um japanska ljóðlist á íslenskri tungu og íslenska ljóðlist með japönsku bragði; um hækur, tönkur og eldingar sem lýsa upp veraldir. Á sama tíma stendur yfir sýningin Dolls of Japan í Gerðubergi.

Hefðbundin japönsk ljóðaform má rekja langt aftur í aldir. Hækan er eitt knappasta ljóðform sem þekkist, sautján atkvæði í þremur ljóðlínum. Þessi örfáu orð búa þó yfir miklum krafti í meðförum snjallra skálda; þau fanga í net sitt einfaldar, en að sama skapi djúpar náttúrumyndir. Hækan hefur stundum verið kölluð ljóð án orða, og er þá átt við að bak við einfaldar myndir ljóðsins leynist annað ljóð – sem lesanda sé falið að yrkja. „Japanska hækan er náttúruljóð, andartaksmynd, snöggrissuð, oft eins og dropi sem gárar vatnsflöt, en líka eins og elding sem lýsir upp veraldir,“ segir í inngangi Óskars Árna Óskarssonar að þýðingum hans á ljóðum meistarans Matsuo Bashô. „Stundum er eins og þetta japanska ljóð segi næstum ekki neitt, en um leið getur það sagt allt sem segja þarf um heiminn.“

Guðmundur Andri Thorsson er rithöfundur, skáld og ritstjóri. Hann sendi nýlega frá sér hækusafnið Hæg breytileg átt. Óskar Árni Óskarsson er ljóðskáld og ljóðaþýðandi. Hann hefur bæði þýtt ljóð eftir japanska meistara hækunnar og í höfundarverki hans má sömuleiðis finna rammíslenskar hækur.

Bókakaffi í Gerðubergi er hluti kaffikvölda í Gerðubergi og haldið mánaðarlega yfir vetrarmánuðina, fjórða miðvikudagskvöld í mánuði. Það er vinsæll liður í viðburðadagskrá Borgarbókasafnsins. Dagskrá Bókakaffis á vormisseri 2017 má kynna sér hér

Umsjón:

Sunna Dís Másdóttir, verkefnastjóri, sunna.dis.masdottir [at] reykjavik.is, s. 411 6109

Dagsetning viðburðar: 

Miðvikudagur, 22. March 2017

Staðsetning viðburðar: 

Viðburður hefst: 

20:00

Viðburður endar: 

22:00